நிமிர்வுகள் - 15 - வழிமொழியும் அரட்டைகள்!
அப்புக்காத்தரும்…. அன்னம்மாக்காவும்.;..
அப்புக்காத்தர்: என்ன மாதிரி…சுகமாய் இருக்கிறியளோ…?
அன்னம்மாக்கா: ஆண்டவன் புண்ணியத்தில நல்ல சுகம்… அதுசரி.. எங்கட வீட்டில ஒரு பிரச்சினை எண்டா யார் தீர்க்கவேணும்…?
அப்புக்காத்தர்: இதென்ன கேள்வி… நாங்கள் தானே தீர்க்க வேணும்…
அன்னம்மாக்கா: இப்பத்தை நாட்டு நடப்புக்களைப் பார்த்தா அப்பிடித் தெரியேல்லையே…
அப்புக்காத்தர்: ஏன் அப்படிச் சொல்லுறியள்…?
அன்னம்மாக்கா: எங்கட வீட்ட ஒரு தலை போறபிரச்சினை
போய்க்கொண்டிருக்கு.. யார் வந்து எங்களைக் காப்பாற்ற வேணும் ?
அப்புக்காத்தர்: எங்கட வீட்டில உள்ள ‘தலைகள’; தான்…எங்களைக் காப்பாற்ற வேணும்..
அன்னம்மாக்கா: அப் பஏன் பக்கத்து வீட்டுப் பகுதித் தலை வந்து எங்களைக் காப்பாற்றேல்லை எண்டு, பத்து வருசம் கழிஞ்சு அந்தாளின்ர செத்த வீட்டில வந்து நிண்டு வசை பாடவேணும்..?
அப்புக்காத்தர்: ஓ…ஓ… அதைச் சொல்லுறியளே…!
அன்னம்மாக்கா: ஒருவரைத் தேவைக்கதிகமாய் ஆராதிக்கவும்
தேவையில்லை… தேவையில்லாமல் விமர்சிக்கவும் தேவையில்லை…
அப்புக்காத்தர்: ஓமோம்… எங்கட தேவை என்ன எண்டே எங்களுக்குத் தெரியேல்லை…
அன்னம்மாக்கா: தேவை மட்டுமே தெரியேல்லை… சொந்தமாய்ச் சிந்தித்து கருத்துச் சொல்லக் கூடத் தெரியேல்லை…
அப்புக்காத்தர்: எங்கட மூளையைக் கழற்றி வைச்சிட்டுத்தானே திரியுறம்…
அன்னம்மாக்கா: ஓமோம்… ஆரேன் சொல்லுறதைக் கேட்டு, அடி நுனி யோசிக்காம அதை ஒட்டியே வழி மொழிஞ்சு அரட்டை அடிக்கப் பழகிட்டம்….
அப்புக்காத்தர்: நாங்கள் நிமிரோணும் எண்டா என்ன செய்யவேணும்…?
அன்னம்மாக்கா: எங்கள நாங்களே குனிஞ்சு பார்த்து. எங்கட குறைகளைக் களையவேணும்… கோஷங்களுக்கும் வேசங்களுக்கும் எடுபடாமல் எங்கட எங்கட வேலைகளைச் செய்து வந்தாக் காணும்…
அப்புக்காத்தர்: நாங்களும் நிமிருவோம்.. நாடும் நிமிரும்...
நெம்பு
நிமிர்வு ஆவணி 2018 இதழ்
Post a Comment