நிமிர்வுகள் - 24 சோதனைக்காலம்
அப்புக்காத்தர்: உயிர்ப்பயமில்லாமல் இப்ப கொஞ்சம் ஆசுவாசமாய் உலவிக் கொண்டிருக்கிறம் எண்டுபார்த்தால், இப்ப புதுத்தலையிடி ஒன்று வந்திருக்கு…
அன்னம்மாக்கா: ஓமோம்… இப்ப எல்லாத்துக்கும் பயப்பிட வேண்டியெல்லே கிடக்குது…
அப்புக்காத்தர்: அதைப் பார்த்தால் பயம், இதைப் பார்த்தால் பயம், அவனைப் பார்த்தால் பயம், இவளைப் பார்த்தால் பயம் எண்டு தெனாலி கமல் போல அலைய விட்டிட்டாங்கள் எங்களை…
அன்னம்மாக்கா: அருண்டவன் கண்ணுக்கு இருண்டதெல்லாம் பேய்தானே
அப்புக்காத்தர்: நல்லா இருந்த நாட்டுக்கு வந்த சோதனையைப் பார்த்தீங்களே…
அன்னம்மாக்கா: எலியை வளையில வளைச்சுப் பிடிக்காமல் றோட்டில வந்தெல்லே தேடிக்கொண்டிருக்கினம்...
அப்புக்காத்தர்: வளைக்கே கை வைக்கேலாது பாருங்கோ… பெரிய கைகள் சிலது காவலுக்கு நிற்குதாம்…
அன்னம்மாக்கா: அப்ப வலி எங்கேயோ இருக்க, மருந்தை எங்கேயோ தடவிக்கொண்டிருக்க வேண்டியது தான்..
அப்புக்காத்தர்: ஒரே பஸ்சை ஒன்பது தரம் பாக்கிறாங்கள்…அடிக்கடி நடக்கச்சொல்லி உடற்பயிற்சியும் தாறாங்கள்…
அன்னம்மாக்கா: வடக்கில மட்டும்தானாம் இப்படி வடிவான சோதனைகள்…
அப்புக்காத்தர்: ஓ… அதுவும் அப்பிடியே…
அன்னம்மாக்கா: கட்டி வளர வளரப் பெருமையாய்ப் பாத்துக் கொண்டு நிண்டு போட்டு, இப்ப வெடிச்சுச் சீழ் வடியத்;தான் எல்லாரும் ஆலாய்ப்பறக்கினம்..
அப்புக்காத்தர்: அதை இதை வேணுமெண்டு கேட்டால் குடுக்கலாம்… உயிர்கள் தான் வேண்டுமெண்டு நிக்கிறவையோட என்ன செய்யிறது ..?
அப்புக்காத்தர்: என்னவோ இனிப்பிரச்சினை வராமல் ஆரம்பத்திலேயே பார்த்திட்டாச் சரி
நெம்பு
நிமிர்வு வைகாசி 2019 இதழ்
Post a Comment